Fréttir

Bláfáninn segir til um (1) góða umhverfisstjórnun sem felst í því að á staðnum séu ílát til að flokka sorp til endurvinnslu, notkun sterkra efna sé haldið í skefjum, tekið sé á móti spilliefnum o.fl. Einnig þurfa rekstraraðilar að bjóða upp á góða hreinlætisaðstöðu. Annað veigamikið atriði er (2) umhverfisfræðsla sem koma á í veg fyrir að starfshættir og önnur umgengni spilli náttúrufari og lífríki til frambúðar. Fræðslan fer fram með ýmsum hætti s.s. í formi lifandi viðburða, skólaverkefna, upplýsingum á vef og skiltum. Á Íslandi er algengt að útbúin sé aðstaða til fuglaskoðunar og víða má sjá dýralífsskilti. Auk þessa er gerð krafa um að (3) vatn sé hreint í höfnum og sömuleiðis að ekki sé heilsuspillandi gróður þar sem gestir baða sig í sjónum. (4) Öryggismál eru einnig mjög mikilvægur þáttur og er nauðsynlegt að björgunar- og skyndihjálparbúnaður sé tiltækur á svæðinu. Einnig öryggisgæsla þar sem mikill mannfjöldi safnast saman á baðströndum.

Umhverfisstofnun Sameinuðu þjóðanna (UNEF) notaði Bláfánaverkefnið sem fyrirmynd til að útbúa handbók um umgengni á strandsvæðum.  Stofnunin vinnur með FEE að ýmsum verkefnum og sömu sögu er að segja um Alþjóðlegu ferðamálastofnunina (UNWTO).

Landvernd er umsjónaraðili Bláfánans á Íslandi en Alþjóðlegu umhverfismenntasamtökin Foundation for Environmental Education (FEE) sjá um rekstur verkefnisins á heimsvísu.